Un total de 440 actuacións compoñen a oferta das redes galegas de Teatros e Auditorios, Música ao Vivo e Salas para o primeiro semestre de 2015. Os programas impulsados pola Axencia Galega das Industrias Culturais medran así un 12,82 por cento a respecto do mesmo período do pasado ano. A AGADIC inviste 446.891 euros na iniciativa nesta primeira parte do ano, e levará estas propostas a un total de 75 salas, teatros e auditorios públicos e privados de 45 municipios.
A Rede Galega de Teatros e Auditorios acollerá neste período 261 representacións en 38 espazos, mentres que na Rede de Música ao Vivo desenvolveranse 120 concertos e seis espectáculos de maxia e de teatro. A Rede de Salas, polas súa banda, albergará 53 espectáculos, dos que preto da metade están pensados para o público infantil.
