A XIV edición o Festival Manicómicos é tamén a do décimo aniversario desta iniciativa. O paradoxo enténdese se temos en conta que durante varios anos o evento contaba cunha edición de verán e outra de inverno e mais que botou varios anos sen se celebrar. Ao final, o que a Coruña acolle a partir deste 25 de outubro é un programa que celebra dez anos de clown e que conta con Hilary Chaplain como grande estrela. Para alén de actuar, a americana imparte desde o pasado día 21 un obradoiro de comedia física. Canda a ela, nesta edición poderá verse ata o vindeiro día 26 o traballo de artistas como Malas Compañías, Arturo Nono, Almove ou O Retrete de Dorian Gray entre outras.
