Tres semanas antes de inaugurar unha exposición en Gondomar, alguén queimou os cadros de grande formato que Ramón Trigo almacenaba na nave industrial que emprega como estudio. Obrigado por esta circunstancia a aprazar a apertura da mostra, o pintor non se desanimou e, inspirado por este acto, creou a serie Cinzas que se pode ver ata o vindeiro 4 de xullo na Aula de Cultura Ponte de Rosas de Gondomar. O artista agasallou aos asistentes á inauguración cunha bolsa coas cinzas dos cadros destruídos como un xeito de que esas obras estivesen presentes no evento.
