10 ideas para a acción cultural

Máis que unha entrevista ao uso, pedímoslle a Ramón Villares, presidente electo do CCG que nos elaborara un decálogo coas liñas centrais de acción da terceira institución do país para os vindeiros anos. A acción exterior, a loita por gañar novos públicos para a lingua e a cultura do país e a dixitalización son os eixos polos que aposta Ramón Villares.

Ramón Villares foi escollido novamente polo Plenario do CCG como Presidente. Fican por diante catro anos nos que Villares apostará por continuar os traballos xa iniciados pero tamén por fortalecer liñas existentes ou novas que o CCG considera estratéxicas e posibles dentro das competencias da institución.

As liñas de actuación para o vindeiro mandato de Ramón Villares poden resumirse neste decálogo:

1. Favorecemento a colaboración entre institucións. O CCG favorecerá as sinerxias internas coas entidades que están representadas no seu Plenario.
2. Descentralización de actividades. O CCG buscará ‘descentralizar’ o seu abano de actividades, tendo máis presenza no ámbito local. Manterase a rotación de exposicións por toda Galicia, e esta dinámica diversificarase agora con outro tipo de actividades.
3. Gañar novos públicos para a cultura galega. A través da penetración e acción en sectores da poboación ata agora non moi vinculados á cultura galega, o CCG buscará estender os valores da cultura e da lingua do país a un espectro maís amplo de poboación.
4. Colaborar cos ámbitos da creación e da industria cultural. O CCG continuará axudando á planificación estratéxica das súas accións, a través de ferramentas coma o Observatorio da Cultura Galega ou os diferentes foros de debate e análise organizados pola institución.
5. Potenciar a acción exterior do CCG. A O CCG sempre prestou singular atención á colaboración coas comunidades galegas da diáspora, pero o obxectivo é complementar a acción exterior prestando máis atención tamén á Europa Atlántica. Ademáis, o CCG deseñará unha estratexia editorial na rede para garantir un acceso básico en linguas foráneas aos contidos esenciais ao redor da cultura de Galicia, xenerando produtos para unha internacionalización básica da cultura galega.
6. Unha ollada dixital de Galicia. Un país denso en cultura e historia como Galicia precisa ser “convertido” a termos dixitais que garantan o acceso, desde unha perspectiva xeográfica, aos novos recursos.
7. Recuperar e dixitalizar Documentación Particular. O CCG continuará dixitalizando coleccións e arquivos particulares de destacadas figuras da cultura e historia galegas e as porá a disposición pública a través dos sistemas dixitais da institución, coma o Epistolario.
8. Plan director do Patrimonio Cultural no exterior. O obxetivo é coñecer o patrimonio depositado nos centros e institucións galegas da diáspora como primeira medida para velar pola súa protección.
9. Clásicos na rede. Tras analizar as estatísticas dos produtos do CCG en Internet, apreciouse a forte demanda que hai entre o público de textos clásicos galegos. O CCG realizará edicións didácticas e de libre distribución de grandes textos clásicos da literatura galega..
10. As Irmandades da Fala. En 2016 conmemorarase o centenario do nacemento das Irmandades da Fala. O CCG está deseñando unha intensa programación para difundir e analizar este importante momento da nosa Historia contemporánea.