Fállanse os I Premios Luceira de Comunicación Social

O portal web Galiza Contrainfo, a televisión por Internet Galiza Ano Cero e mais a revista Andaina de pensamento feminista foron as iniciativas galardoadas cos I Premios Luceira de Comunicación Social. A Facultade de Ciencias da Comunicación de Santiago de Compostela acollía onte o acto de entrega dos galardóns, convocados por varias organizacións do terceiro sector galego. Máis de mil votos por Internet seleccionaron os gañadores entre as 17 iniciativas que se presentaron ao certame.

A Coordinadora Galega de ONG para o Desenvolvemento, a Rede Galega contra a Pobreza (EAPN-Galicia), o Comité de Entidades Representantes de Persoas con Discapacidade de Galicia (CERMi Galicia), a Asociación Galega de Reporteiros Solidarios (AGARESO) e a Asemblea de Cooperación pola Paz (ACPP) organizaron estes galardóns cos que pretenden "visibilizar e poñer en valor propostas de comunicación en Galicia que están a dar cobertura ás temáticas do eido social baixo un enfoque de calidade, análise, reflexión e participación da sociedade".