O Ministerio de Cultura acaba de facer públicas as estatísticas do rexistro do ISBN, o número que identifica os libros publicados en todo o Estado, durante 2013. Segundo estas cifras, o libro galego continúa a minguar a súa presenza no mercado editorial, aínda que o descenso é menos acusado do que o doutros idiomas. Así, en 2013 publicáronse un total de 1.426 títulos na nosa lingua, tanto na nosa comunidade como fóra, o que supón un descenso do 12% fronte ao 15% do catalán ou o 22% o eúscaro.
En canto aos libros editados en Galicia, a produción mantén case os mesmos niveis do que no anterior ano con 2.494 títulos, só un 1,3% menos, o que contrasta co afundimento das cifras a nivel estatal. Pola contra, a edición en soportes diferentes do papel mingua no noso país case un 3% no período estudado, mentres no conxunto de España medra este tipo de publicacións.
Do mesmo xeito, tamén o número de axentes editoriais mantén o descenso que arrastra desde 2010, aínda que o fai dun xeito máis suave do que no resto do estado, cun total de 144 en activo no último ano nesta base de datos, tres menos do que en 2013.
