Teatro do Noroeste aborda a actual crise de valores a través da Mamma

A última proposta de Teatro do Noroeste continúa a liña de traballo xa amosada nas súas últimas producións Último cowboy e Linda and Freddy, ilusionistas, de conectar ca realidade máis próxima e inmediata, de falar da crise social e humana desde a ironía e a retranca. Desta volta, da man de Lino Braxe como director, presentan A mamma que pon en escena a vida dunha muller loitadora que rememora con estraña lucidez os tempos pasados e o presente nos últimos días da súa vida.

Non é a primeira vez que Teatro do Noroeste, unha da compañías máis veterás do teatro galego, se presenta cun espectáculo unipersoal. Antes fíxoo con Feirantes, Campo Sur, tamén de Lino Braxe ou A tixola polo mango, de Lola Correa. Agora faino motivado polo contexto actual, de “crise e de falta de apoios” segundo publican no seu web, co que se afastan dos espectáculos de grande formato abordados por esta compañía.