Na rolda de prensa estiveron presentes Ramón Villares, Presidente do Consello da Cultura Galega, Rosario Álvarez Blanco, vicepresidenta do CCG e María do Cebreiro Rábade, unha das editoras da correspondencia.
Ramón Villares, presidente do Consello da Cultura Galega, situou o Epistolario dixital de Rosalía de Castro na perspectiva máis ampla do proxecto de Epistolarios dixitalizados que está a emprender o CCG. Para Rosario Álvarez Blanco, vicepresidenta do CCG, hai que encravalo nun exercicio de recuperar a memoria e facela presente, así como de crear novo coñecemento, e dentro dos proxectos de máis longo alento acometidos polo CCG, tras seren fixados no ano rosaliano de 2013.
O Epistolario dixital de Rosalía de Castro pode consultarse en epistolarios.consellodacultura.org. O Epistolario dixital de Rosalía de Castro supón a segunda incorporación dunha colección de correspondencia ao Proxecto Epístolas do Consello da Cultura Galega. Son 18 cartas que Rosalía remite a Manuel Murguía, Eduardo Pondal ou a Ángel Baltar, e que foron editadas polo Centre de la Dona de la Universitat de Barcelona, baixo a dirección de Helena González, María Xesús Lama e María do Cebreiro Rábade.
Precisamente esta editora suliñou que estas cartas supoñen unha revalorización da investigación biográfica ao redor de Rosalía de Castro, xa que na nova transcrición realizada para a súa publicación, aparecen importantes matices que realzan o papel de Rosalía como escritora consciente de selo e cunha marcada ironía, talento e vontade de estilo, segundo María do Cebreiro Rábade.