Un camiño de peregrinación que partía de Portela do Home e atravesaba Padrenda, Pontedeva, Cortegada, Arnoia e chegaba por Beade ata Forcarei e de alí a Santiago de Compostela. Esta é a ruta que quere documentar e oficializar a asociación Camiño Xacobeo Miñoto Ribeiro. No marco desta iniciativa o colectivo, en colaboración coa Universidade de Vigo, acaba de pór a andar o proxecto Pegadas. Esta proposta pretende recoller en todos os concellos polos que transcorre a ruta información sobre restos e lembranzas arredor do fenómeno da peregrinación na zona en colaboración coa poboación local.
Segundo sinala Lourdes Maceiras, coordinadora do proxecto, a ruta era empregada, entre outros polos leprosos que peregrinaban a Compostela, o que queda reflectido nos restos de hospitais e lazaretos que se conservan ao longo do camiño.
