Mentres continúan as obras de restauración do Pórtico do Paraíso e a capela de San Xoán da Catedral de Ourense, os técnicos están a avaliar o estado de conservación do pórtico norte do templo. Os tres restauradores atoparon a porta moi danada, con moitísima humidade e sales, que están afectando a un importante conxunto escultórico. O delegado diocesano de Patrimonio, Miguel Ángel González, sinalou que "a portada estase a desintegrar". O estudo foi encargado pola Dirección Xeral de Patrimonio, que é o organismo que está a financiar as outras restauracións da Catedral.
