Anuncio francés de Astérix e os pictos
Logo das múltiples reclamacións que se foron sucedendo nos últimos anos, semella que a serie de Astérix verá por fin a luz na nosa lingua. Edición Xerais anunciou que se fixo cos dereitos desta celebérrima banda deseñada, e iniciará o vindeiro 24 de outubro a publicación con Astérix e os pictos, o novo álbum, que sairá ao tempo que a edición francesa. Precisamente o título é o primeiro no que Uderzo deixa o debuxo do seu personaxe, que pasa ás mans de Jean-Yves Ferri no guión e de Didier Conrad ao debuxo. Para o vindeiro mes de marzo a editora viguesa prevé continuar coa edición das aventuras anteriores do coñecido galo cos títulos Astérix o Galo e mais Astérix e a fouciña de ouro, segundo adianta Eduardo Maroño no seu blog Qadriños.
