Agadic reactiva o programa de actuacións culturais nos concellos do Camiño cun novo nome

Non é un formato novo: programar espectáculos de teatro, danza, narración oral, novo circo, maxia e música de todos os estilos naqueles concellos do Camiño de Santiago que non estean adscritos á Rede Galega de Teatros e auditorios co obxectivo de descentralizar a actividade cultural. Un programa que financian a medias entre a administración local e autonómica a través de Agadic. O programa que antes se chamaba Camiños de cultura reconvértese agora en Cultura no camiño con algunhas variantes. A primeira delas o calendario, que en lugar de ser en época estival será no outono e a segunda que se insire na programación conmemorativa do oitavo centenario da peregrinación a Santiago de San Francisco de Asís. O prazo de presentación de propostas por parte das compañías que queiran facer parte da proposta, así como o de concellos interesados en programar está aberto ata o 31 de agosto.