O humor e a comedia volven ás salas, rúas e bares coruñeses en setembro. Será do 4 ao 8 deste mes cando se celebre a XIII edición do Festival Manicómicos. Un encontro que organiza a asociación cultural que dá nome ao festival e que conta co apoio do concello que cede espazos e medios técnicos para facer posible este encontro. Agás a presenza do humorista Pepe Viyuela, todas as compañías e artistas que compoñen o cartel deste ano son galegos. Os prezos das entradas oscilan entre os 5 e os 15 euros. Alén das representacións, destaca na programación unha mesa redonda que falará da situación e perspectivas de futuro dos escenarios alternativos.
