Un espectáculo infantil abre a XXXV edición da Mostra de Teatro de Cariño

Son xa trinta e cinco as edicións que celebra a Mostra de Teatro de Cariño, das máis antigas de Galicia. Constituída por primeira vez en 1978 cando a formación afeccionada As Traíñas puxo en marcha unha mostra de teatro galego e portugués. Nesta ocasión son oito os espectáculos programados: catro para público infantil (entradas a 1 euro) e outros tantos para público adulto (entradas a 5 euros). Desde hoxe ata o domingo pasarán por alí montaxes moi concorridas como as Gaivotas subterráneas de Talìa Teatro ou “Misterio cómico”, que recupera Teatro do Morcego coa que recibiron o Premio Compostela. A casa da cultura e o auditorio son os escenarios da mostra.