Para poñer en marcha algunhas cousas abonda un correo electrónico. Así, cun mail, comezou o proxecto Nimbos. É unha iniciativa promovida por Martin Pawley, Xurxo Chirro e José Manuel Sande que remitiron un correo electrónico a 30 realizadores co obxectivo de facer un audiovisual arredor de Nimbos, a obra poética de Xosé maría Díaz Castro, o vindeiro homenaxeado no Día das Letras Galegas. Segundo explican no blog Acto de primavera, unha vintena deles xa confirmaron a súa adhesión a esta proposta. A cada un pedíronlle que fagn unha peza curta a partir dun dos poemas da obra. Liberdade total só suxeita a dúas condicións: que dure entre 1 e 5 minutos máis evitar o uso íntegro e literal dos poemas.
De momento, os nomes confirmados para esta proposta son: Xurxo Chirro, Margarita Ledo, Eloy Enciso, Alberto Gracia, Oliver Laxe, David Castro Sopeña, Carlos Álvarez-Ossorio, Diana Toucedo, Juan Lesta, Belén Montero, Xacio Baño, Pablo Cayuela, Xan Gómez Viñas, Jaione Camborda, Víctor Hugo Seoane, Otto Roca, Alfonso Zarauza, José Antonio Cascudo, Ángel Santos, Manuel Fernández-Valdés e Eloy Domínguez Serén. Con todo, é posible, que haxa novas incorporacións.
