É a undécima edición dun encontro que busca dar a coñecer a danza universitaria á cidadanía de Compostela. Oito compañías (pertencentes a varios campus universitarios galegos máis unha portugesa) fan parte dun programa que incluíu tamén unha sesión de danza terapia e un programa de exhibición e pezas curtas (con intervencións que non exceden os cinco minutos). O XI Encontro Universitario de Danza Contemporánea non se reduce a exhibición xa que pretende ser un espazo de residencia e de traballo para os artistas participantes.
As compañías que integran esta dición son: a TeatrUBI da Universidade da Beira Interior de Portugal; a Aula de Danza da Universidade de Barcelona; a Aula de Danza NORMAL da Universidade da Coruña; D-ou-tras, do Campus de Ourense da Universidade de Vigo; as compañías de danza de Lugo e Santiago; e a compañía independente da USC Zur 2 Danza-USC.
Esta actividade encádrase no marco de actividades que a universidade compostelá desenvolve no eido da danza. Alén de sete cursos desenvolvidos ao longo deste ano no vindeiro mes de xuño realizará un obradoiro de integración social a través da danza.
