Comeza a mostra de Teatro Universitario da Universidade da Coruña

Onte arrincou en Coruña unha nova edición da Fiteuc, o festival internacional de teatro universitario desta universidade. Unha cita que se desenvolverá ata o vindeiro 7 de maio en tres escenarios: no espazo NORMAL, no Fórum Metropolitano e no Teatro Rosalía Castro. Tal e como fóra anunciado, a figura de Roberto Vidal Bolaño ocupa un lugar central na programación. Nesta ocasión haberá dúas propostas a raíz de Animaliños, a que fixo a compañía de teatro da USC de Lugo máis a aposta da Aula de Teatro da Universidade de Vigo. A aula de Teatro da UDC preséntase ao público con “A burla do galo” baixo a dirección de Rubén Ruibal. Ademais, da programación destaca unha ampla presenza de compañías de danza, así como espectáculos en espazos non habituais como corredores, vestíbulos e cafetarías.