A Xunta non recorrerá a sentenza sobre o Decreto do Plurilingüismo

O presidente da Xunta, Alberto Núñez Feijóo, anunciaba esta mañá que o seu goberno non recorrerá a sentenza sobre o Decreto do Plurilingüismo do Tribunal Superior de Xustiza de Galicia (TSXG). Segundo Feijóo, o goberno renuncia a levar esta cuestión ante o Tribunal Supremo ao considerar que o TSXG validou "o 95% da norma" e que con este paso, o texto fica "blindado con seguridade xurídica". Malia a que un dos puntos desestimados polo TSXG deste texto era o feito de que as consultas aos pais sobre a lingua dos alumnos fosen vinculantes, o presidente apuntou que as mesmas seguirán a se desenvolver. Advertiu no entanto que "seguiremos facendo as consultas, pero non producen efectos legais de forma inmediata, porque a sentenza o impide", ao tempo que recoñecía que o resultado das mesmas "será determinante para que nós adoptemos unha decisión ou outra".

O polémico texto, asemade, chegará a Madrid logo de que a Real Academia Galega presentase recurso ante o Tribunal Supremo, que se deberá pronunciar sobre a legalidade do mesmo.