“Na última edición pensamos que o Festival Alt debería achegar ao público e aos creadores algo máis que a exhibición” explica Roberto Taboada, coordinador de actividades do festival vigués. Foi así como detrás desa intención naceu ALT-Procrea, unha sección dedicada apoiar proxectos escénicos que entroncasen dentro da liña artística do certame en todas as fases da produción. "Non se trata de producir un espectáculo e logo desvencellarse unha vez que está feito, senón ofrecer a nosa experiencia para logo poder distribuilo e darlle cabida” explicaba Taboada. No marco desta proposta este ano produciranse catro espectáculos a cargo dos creadores Diego Anido, Mercé de Rande, Nuria Sotelo e Estela Lloves. O vindeiro día 8, no ecuador desta edición do Alt,presentarán unha mostra dos seus traballos que aínda en proceso de produción. Ademais, Taboada baralla a creación “dunha extensión do festival, para o outono, para poder exhibir aquí os resultados destes proxectos”.
