“O compromiso que dende a súa fundación, no ano 1998, ten mantido co noso idioma, coa nosa cultura e coa nosa terra, desexando lanzar con este recoñecemento unha mensaxe de futuro para a nosa lingua, por entender que Galicia e o galego poden e deben ser ferramentas válidas a tódolos efectos no complexo ámbito da enxeñería das comunicacións e na inmensa rede da globalización”. Así xustificaba o Padroado da Fundación Curros a concesión o pasado sábado do XXIX Premio Celanova, Casa dos Poetas ao grupo R de telecomunicacións.
O organismo reuniuse na sede da Fundación en Celanova e acordou ademais promover entre a sociedade civil a Asociación de Amigos e Protectora da Real Academia Galega para garantir o financimento desta institución. O premio entregarase o vindeiro día 8 de setembro.
