Desde hoxe pola tarde, na inauguración (20 h.) ata o 28 de xuño, o Museo Pedagóxico de Galicia, en Santiago, acolle a exposición "Luces de Alén Mar. As Escolas de Americanos en Galicia", promovida polo Consello da Cultura Galega a través do Arquivo da Emigración Galega. A exposición nútrese do traballo de investigación que o Arquivo da Emigración levou a cabo ao redor dun importante fenómeno da nosa Historia: as sociedades de emigrantes que custearon a construción e mantemento de escolas nas súas localidades de orixe a principios do século XX, renovando decisivamente a educación en Galicia. Escolas, documentos, fotografías, obxectos, planos...este traballo complétase co web As Escolas da Emigración, que permite comprender este importante fenómeno colectivo e a súa distribución en Galicia.
