Chega a Santiago a exposición que documenta o labor educativo da emigración

Foi un fenómeno enriquecedor porque os cartos que os emigrantes enviaron a Galicia serviron para crear e manter escolas. As chamadas Escolas de emigrantes están localizadas, documentadas e contextualizadas en Luces de Alén Mar. As Escolas de Americanos en Galicia. A mostra está promovida polo Consello da Cultura Galega, a través do seu Arquivo da Emigración Galega co gallo do centenario fundacional das Sociedades Galegas de Instrucción radicadas en América. A exposición, que chega agora ao Museo Pedagóxico de Galicia en Santiago, é a faceta divulgativa dun proxecto que pretende recuperar o legado educativo da emigración. Despois desta estadía, a exposición continuará o seu percorrido por Galicia e estará nas Pontes.