Proxeccións comentadas abren o ano Roberto Vidal Bolaño do CDG

É unha peza clave do teatro profesional galego. Ata tal punto que sen a súa figura non se entenden as artes escénicas do país. Neste ano, cando se lle dedica o Día das Letras Galegas, Roberto Vidal Bolaño centrará e unificará a programación do Centro Dramático Galego (CDG). A forma na que o CDG abordará a súa figura arrincará con Vidal Bolaño recuperado. Citas audiovisuais, un ciclo de proxeccións de fragmentos de obras teatrais gravadas do autor comentada por dous especialistas: Inma López Silva e Xosé Manuel fernández Castro.

Son doce as proxeccións que se emitirán para afondar na figura de Roberto Vidal Bolaño: sete que corresponden as producións que dirixiu ou serviu de autor para o Centro Dramático Galego mais as cinco que escribiu e dirixiu para as súas compañías Antroido e Teatro do Aquí. Agora. As proxeccións arrincan en 1984, ano de fundación da compañía pública coa obra Agasallo de sombras e rematan en As actas escuras, obra que Xulio Lago dirixiu en 2010.