O pasado sempre volve

Ten todos os ingredientes para ser un dos éxitos teatrais da temporada. Unha factura de produción impecable, dous actores moi populares como son Luis Iglesia e Xabier Deive (ambos os dous personaxes da serie da TVG Matalobos) e a solvencia de tres compañías recoñecidas de diferentes ámbitos: RTA na de servizo técnico, Talía Teatro nas artes escénicas e Voz Audiovisual. Agora, a reposta a Gaivotas Subterráneas tena o público a partir de hoxe, cando se levante o pano do Rosalía de Castro (A Coruña).

“Buscabamos un experimento comercial, que non se escatimara na escenografía e contratando a dous actores que ademais de coñecidos foran os máis axeitados posible para os papeis” explica Artur Trillo, director de Talía Teatro e promotor deste proxecto. Non era a primeira vez que a compañía ceense se enfrontaba a este texto. Fíxoo nos noventa, cando eran afeccionados e a outra escala. Desta volta contan con toda unha estrutura, a de Voz Audiovisual e RTA para darlle forma a un espectáculo que conta a historia dun home, que cita a un vello amigo da infancia para facerlle unha complicada proposta. “É un espectáculo en clave de suspende, entre dous vellos amigos onde o público ten que ir descubrindo pouco a pouco o que pasou” explica Artur Trillo de Talía Teatro que avanza que o texto conta con numerosos xiros argumentais para xogar co espectador.

Primeira incursión teatral de Voz Audiovisual
A obra conta en si mesma cun pequeno fito porque é a primera vez que unha empresa como Voz Audiovisual, a división audiovisual de La Voz de Galicia, se incorpora a unha produción escénica. “Asumimos a produción deste espectáculo caro as tres compañías por igual, aínda que temos unha parte non cuantificable do espectáculo, que é posible precisamente pola fusión destas tres entidades” explicou Artur Trillo, que foi o promotor desta proposta que estará de xira por toda Galicia.
Trala estrea na Coruña, Gaivotas Subterráneas estará en Cangas, Oleiros, Vigo, Pontevedra, Narón e Santiago nunha primeira xira. Un listado que pretenden ampliar unha vez que se abra a programación da Rede Galega de Teatros e Auditorios, que a Agadic aínda non abriu para este primeiro semestre. “Dependerá do reclamo do público, pero non descartamos volver a actuar nalgunha localidade das xa anunciadas” apuntou Trillo.