Todoterreos vandalizan as murallas do castro de Saa

É relativamente frecuente o emprego dos xacementos arqueolóxicos como espazos de práctica para motocross e todoterreos. A última noticia é que uns descoñecidos decidiron empregar os catro parapetos da maxestuosa entrada suroeste do castro de Saa (A Pastoriza, Lugo) como zona de prácticas para todoterreos. Segundo os veciños, que non viron a acción, os todoterreos remontaron as catro liñas de parapetos durante varios días e están a danar de forma ostensible as murallas. Tanto o alcalde da Pastoriza, Primitivo Iglesias, como o experto local Mario Saavedra, cren que o ataque é intencionado e deliberado, xa que o castro está sinalizado como tal nos seus accesos e é un ben público ben coñecido no municipio.