Logo de se poder ver en Compostela a pasada primavera, a exposición Un canto e unha luz na noite. Asociacionismo cultural en Galicia (1961-1975) chega á Casa da Cultura de Vigo. A exposición fai un amplo percorrido polo panorama das asociacións culturais galegas durante o franquismo, unha fase fundamental na configuración da identidade e do panorama creativo do país e que foron base do galeguismo político da época. A coincidir con esta xeira, o Consello da Cultura edita na rede o catálogo completo da mostra, que explica e completa os contidos da mesma.
Textos de Xosé Carlos Sierra, Elías Torres, José-Martinho Montero Santalha ou Euloxio Ruibal entre outros analizan o fenómenos das asociacións neste volume, que inclúe reproducións dos propios paneis da mostra e de abondosas fotografías e documentos.