Hoxe é o primeiro día no que o xornal El País sae á rúa sen o caderniño central que dedicaba a Galicia desde que se iniciara a súa publicación en 2006. Canda a este espazo, desaparece tamén a sección cultural Luces, que se publicaba cada venres. No seu lugar, o xornal achega unicamente dúas páxinas dedicadas ao noso país. A desaparición deste espazo informativo provocou unha intensa resposta nas redes sociais como Twitter, co tag #queremoselpaisgalicia e unha campaña de recollida de sinaturas mediante o web Change.org.
Pola súa banda, o Colexio de Xornalistas de Galicia denunciou que a eliminación da sección dedicada a Galicia "racha no caso galego cunha traxectoria xornalística recoñecida durante seis anos xustos, e afecta moi negativamente á biodiversidade informativa que debe existir en calquera sociedade".
