Cartel da xornada de homenaxe a Tereixa Navaza
A Comisión de Igualdade do Consello da Cultura Galega recoñecerá o traballo xornalístico de Tereixa Navaza cunha xornada dedicada á súa figura. Tereixa Navaza. A voz da liberdade celebrarase o vindeiro 25 de outubro na sede da entidade, en Compostela, e contará coa presenza de relatores como Manuel Lombao, Marta Pérez Pereiro, Belén Puñal, Carme Vidal, ou a propia Navaza, que manterá unha conversa con Manuel Rivas e participará nunha mesa redonda sobre a primeira xeración de mulleres xornalistas no noso país.
Segundo anuncia o programa do evento, "Tereixa Navaza representa a concepción dun xornalismo implicado coa sociedade do seu tempo. Unha información con perspectiva propia que se amplía no compromiso co movemento feminista e na defensa dos dereitos das mulleres na procura dunha sociedade máis xusta". A inscrición para participar no encontro está aberta.
