Galicreques aposta polo público para completar o financiamento desta edición

Cada ano pasan por Galicreques uns 6.000 asistentes, dos que arredor de 2.000 son escolares e un público eminentemente familiar. O teatro de marionetas ten neste certame, unha cita ineludible que sufriu continuas modificacións de programa pero sempre fiel á mesma liña de ofrecer espectáculos de todas as técnicas posibles (luvas, de dío, de pau, muppets, variñas…). Chegou a ter 60.000 euros de orzamento pero este ano terá só a metade e dependerá da venda de entradas para completar o seu financiamento. Adaptacións literarias e espectáculos breves (de dez minutos de duración) conforman a oferta desta edición na que participan 16 compañías. Do 29 de setembro ao 7 de outubro é a hora dos títeres.

“Segue sendo internacional, pero un pouco menos que outros anos” explicaba Jorge Rey, director de Galicreques, o encontro de títeres de Santiago que arranca o sábado cunha obra pensada para o público máis pequeno e coa música de Mozart como protagonista (Do, re, mi Mozart xoga aquí). Arxentina (cunha adaptación de La Celestina, a cargo da compañía arxentina Teatro di Commedia), Portugal (que ofrecerá unha premiada obra, Prometeo que é de sombras con imaxe manipulada) e Polonia (cunha coprodución con Cataluña que ofrecen bonecos realizados con bolsas de plástico) son os tres países que participarán este ano. “A falta de compañías estranxeiras suplirase coa presenza de máis compañías do resto do Estado” concluía Jorge Rey. Con todo, a cita mantén as cifras de espectáculos que este ano incorporan a zona C como espazo escénico, ao Teatro Pincipal. Con todo, os espectáculos de rúa seguirán a ser un dos grandes reclamos desta cita. Destaca este ano, a carpa que O retrete de Dorian Gray contará no paseo da Alamade para ofrecer “Teatriño máxico”, unha microobra que conta historias con mans e ollos en dez minutos.

O premio Galicreques recae neste ano en Paco Peralta, artista plástico nado en Cádiz pero residente en Madrid e unha figura clave no mundo do teatro de bonecos a día de hoxe. De feito, Rey quixo destacar o papel que Peralta tivo no desenvolvemento “dese movemento importante deste tipo de teatro en Galicia trala súa participación nun curso en 1987”.

Outras actividades
Entre as actividades que completan a programación deste ano destacan os cursos de manipulación de títere bocón fronte a cámara. “Unha forma de actualizarse aos novos medios” puntualizou Jorge Rey e que impartirá Santiago Alonso, da compañía Galitoon que é mestre puppeter en The Jim Henson Company, entidade creadora de Alf, os Teleñecos ou Fraguel Rock.

No que afecta ás exposicións, destaca Teatriños de papel (Arteria Noroeste) que recolle un centenar de teatriños de papel en tres dimensións que recrean algúns dos máis famosos contos da literatura infantil. “É unha tradición moi antigo en Europa e é a primeira vez que se exhibe no Estado unha mostra deste tipo” aclaraba Jorge Rey ao tempo que indicaba que inclúe reproducións de coñecidos espazos escénicos como a Scalla de Milán ou do Teatro da Ópera de París.