Tarsy Carballas, á dereita, nun acto de homenaxe a María Wonenburger
É unha pioneira no estudo da xénese, clasificación e cartografía dos chans do noroeste peninsular. Alén diso, son moi relevantes as súas investigacións na recuperación de terreos en zonas afectadas por incendios . Esta dilatada traxectoria acaba de valerlle a Tarsy Carballas (Lugo, 1934) o premio María Josefa Wonenburger 2012 que concede a Unidade de Muller e Ciencia de Galicia.
Carballas, que está vencellada ao CSIC desde 1965, desenvolve actividades académicas no Instituto de Investigacións Agrobiolóxicas de Galicia e conta con máis de 230 publicacións. Este novo recoñecemento súmase ao currículo desta investigadora que recibiu en 2009 a Medalla Castelao.
