Pamen Pereira
O don do tempo é o lema sobre o que pivota a colección da coñecida casa de alta costura francesa Hermés para as súas coleccións do 2012. Anualmente, esta firma selecciona a un artista para que traslade a filosofía de cada colección a unha intervención nun dos escaparates da súas boutiques. Este ano escolleu á galega Pamen Pereira (Ferrol, 1963), que se converte na primeira española. A ferrolá elexiu a tenda do Paseo de Gracia (Barcelona) para ofrecer unha intervención efémera que se poderá ver do 12 ao 19 de setembro e no que trasladará o seu discurso plástico. A proposta ten outra particularidade, que non se limitará ao escaparate, interactuando en todo o espazo da boutique.
Será unha proposta efémera e exclusiva que se insire no marco do proxecto carte blanche que a maison desenvolve cada ano para promover un vencello con artistas contemporáneos e talentos novos. Nunha nota de prensa remitida pola casa, destácase que “a instalación que firma a artista galega reflexiona sobre a fugacidade da naturaleza fenoménica e a relación entre instante e eternidade”.
Non é a primeira vez que un artista galego se integra na dinámica dunha casa de moda. Hai dous anos, o artista galego Carlos Maciá (Lugo, 1977) fixo o deseño dunha serie de panos da coñecida casa española Loewe, para a que reinterpretou un modelo clásico da firma aplicándolle a grama cromática característica deste lucense.
