Chamábase Xosé Ramón Fernández Oxea (Ourense, 1896- Madrid, 1988) pero púxose o alcume de Ben-Cho-Sey para asinar as crónicas de guerra que enviaba desde Marrocos ao diario ourensá La Zarpa a principios dos anos vinte do século pasado. Foi etnógrafo, escritor, historiador pero sobre todo pedagogo. Neste 2012, a Deputación de Lugo declarou o “Ano Ben-Cho-Sey” e vai avanzando, aos poucos, actividades sobre a súa figura. A última en anunciarse será unha exposición que o museo da Deputación abrirá o vindeiro 18 de novembro para dar conta do seu labor entre 1918 e 1968. Deste xeito, permitiraselles repasar a vida cultural galega e o maxisterio cultural desenvolvido na provincia neses anos con nomes como o de Peña Novo, Vilar Ponte ou Castelao. Antes desa mostra, no mes de setembro, a vicepresidencia da deputación presentará Diario de Lugo, un documento que reflexa a magnitude da represión en Galiza entre o 18 de xullo e o 29 de agosto de 1936.
