O Museo do Mar ábrese a comercializar artesanía

A unión entre os oficios tradicionais do mar e os produtos artesáns foi unha relación que motivou a apertura da Tenda de Artesanía de Galicia nas instalación do Museo do Mar. Trátase dun proxecto impulsado pola Consellaría de Economía e Industria para difundir os produtos de oficios tradicionais galegos en lugares turísticos ou con afluencia de visitantes. O novo espazo comercial manterá o horario do museo e inclúe produtos relativos a diferentes artesáns (cestaría, olaría, téxil…) das catro provincias. A apertura chega na mesma semana na que o Museo do Mar anunciou a colaboración co Marisquiño, festival de cultura urbana, pola que se instalará un graffiti mural de carácter permanente.