Robert G. Picard, Manuel Gago e Paulo Faustino. Foto: CCG
Dixitais, con información máis contextual e explicativa, de caracter informativo local ou rexional, especializados e moi vinculados ás súas comunidades locais. Esta é a aposta do director do Research Institute de Reuters en Oxford e experto en economía de medios para o futuro dunha industria de comunicación en crise. Picard falou de que a crise dos medios non é tanto coxuntural como estrutural, e se basea na perda de valor do seu contido por múltiples motivos: desde o xurdimento de empresas da comunicación que soterraron parte do valor dos produtos previos ata a multiplicación e difusión do contido por múltiples vías, que leva a anular o seu valor pero tamén a crear o efecto adverso: a maior selección da información por parte dos usuarios. Picard estivo acompañado por Manuel Gago, director de culturagalega.org e por Paulo Faustino, consultor portugués que reflexionou sobre medios de comunicación e políticas públicas.
