Cidadáns Totais

A XVI edición dos Premios María Casares de Teatro non defraudou. Con Citizen total e a compañía Chévere como grandes gañadores da noite, a Asociación de Actores e Actrices de Galicia reivindicou a súa profesión. Con retranca, o presidente da Asociación asegurou que “damos un paso adiante para reinventarnos no século XXI no Gran Teatro das Ruínas”.

Onte pola noite o Teatro Rosalía de Castro da Coruña acolleu, como é tradicional, a gala da XVI edición dos Premios María Casares de Teatro, nos que a obra Citizen total de Chévere e Oeste solitario de Producións Teatrais Excéntricas foron as grandes gañadoras da noite.

A compañía Chévere foi a indiscutible gañadora da XVI edición dos Premios María Casares de Teatro. Por unha banda, a sala Nasa promovida pola compañía Chévere recolleu o Premio de Honra Marisa Soto. En palabras do xurado, a Sala Nasa foi merecente do premio “por ser unha sala alternativa independente de referencia en Galicia e no Estado español, converterse nunha sala de exhibición imprescindible, provocar unha xeración de profesionais e por ser un proxecto diferenciado e innovador”.

Pero é que, ademáis, Chévere subiu unha manchea de veces ao escenario, grazas á súa obra Citizen total, na que a compañía se inspira na biografía de Amancio Ortega para ofrecer a historia da construción dun imperio económico en Galicia a partir do téxtil. Foron nada menos que cinco galardóns. Citizen obtivo o premio ao mellor espectáculo, e Xesús Ron fíxose co galardón á mellor dirección pola mesma obra, namentres que Patricia de Lorenzo gañou o de mellor actriz protagonista e a súa compañeira Mónica García a de mellor actriz secundaria. O triunfo de Citizen completouse coa mellor música orixinal, que foi para o compositor Xacobe Martínez Antelo.

A segunda obra máis premiada por Oeste Solitario, de Producións Teatrais Excéntricas, que obtivo tres galardóns: mellor actor protagonista, para Evaristo Calvo, mellor adaptación-tradución para Avelino González e mellor iluminación para Octavio Mas. Outros premios chegaron a outras producións do ano. Vicente de Souza mereceu o mellor actor secundario por Tango, de Sarabela Teatro, o mellor texto orixinal en galego foi para Avelino González, Artur Trillo, María Ordoñez e Sechu Sende por Pelos na lingua (Talía Teatro). O premio de Escenografía foi para Paco Conesa por Piratas, de Teatro do Noroeste. A Ópera dos Tres Reás, o espectáculo do CDG que foi a gran perdedora da noite, obtivo dous galardóns, por mellor vestiario (Carlos Alonso) e por mellor maquillaxe (Trini Fernández).

Tempo de reivindicación
A gala escenificouse na escenografía dun teatro en ruínas, deseñado pola compañía Obras públicas. O presidente da Asociación de Actores e Actrices de Galicia, Antonio Durán “Morris” ofreceu un discurso cheo de retranca reivindicando a un novo grupo de “autores contemporáneos” como “Goldman Sachs, Lehman Brothers, Xosé Luis Méndez, Standard & Poor’s, Moody’s, Xulio Gayoso…” dos que “bebe hoxe a nosa escena nacional”.

O Presidente da Real Academia Galega, Xosé Luis Méndez Ferrín, redactou e leu o Manifesto Galego do Día Internacional do Teatro. Ferrín reivindicou as políticas públicas en defensa do teatro: “os estados están obrigados a protexer e dotar de recursos os teatros nacinoais, como están obrigados a manter un sistema nacional de educación. Esta obriga atinxe de pleno e no centro das súas responsabilidades á Xunta de Galicia”.

Imaxes da gala

A Sala NASA recibe o Premio de Honra Marisa Soto. Foto: Corsino

Xosé Luis Méndez Ferrín le o Manifesto

Compañía Obras Públicas. Foto: Corsino

Evaristo Calvo recolle o premio a mellor actor protagonista por Oeste solitario. Foto: Corsino

Antonio Durán "Morris" le o discurso como presidente da Asociación de Actores e Actrices de Galicia