Un programa de mes e medio baseado na experimentación co son. Esta é a oferta que fai a sala Normal, da Universidade da Coruña ata o final deste mes. Nosomoson mestura arte, performances, documentación sonora e interactividade co público a reivindicar o mundo que coñecemos polo ouvido. Se o Macrófono de Escoitar.org percorría recentemente as rúas da cidade rexistrando os seus sons, na sala continúan a se expor diferentes pezas que teñen o son como principal elemento, e ata o vindeiro 27 de abril poden verse diferentes proxeccións e concertos.
Desde as instalacións interactivas de Berio Molina ou Servando Barreiro, á roupa sonora que Igmig poñen a disposición do público ou as esculturas con son de Manuela Barile, a exposición convida a se achegar á arte con novos sentidos e a descubrir os xeitos de vivir o son.
