A rede recolle homenaxes dos nosos creadores de banda deseñada ao xenio recentemente falecido

O falecemento de Jean Giraud Moebius figura indiscutible da banda deseñada a nivel mundial, está a ecoar, com non, entre os creadores galegos. Deste xeito, son xa varios os autores, como Santy Gutiérrez, José Domingo e Kike Benlloch ou Miguel Porto, que contribuíron cos seus particulares homenaxes na forma de debuxos a través do web Luggage for the long journey of Moebius. O espazo foi promovido polo muradán Akeno Omokoto, e recolle contribucións deste tipo de todo o mundo. Canda a eles, o web Zona Negativa recolle as lembranzas de como entraron en contacto co falecido autores como Emma Ríos, Tirso Cons, Roque Romero ou o propio Akeno, entre outros.

Tamén Javier Aguilera recollía no seu cadriño do Faro de Vigo o pasado domingo o pasamento do autor.

A pegada de Moebius na nosa BD, no entanto, pódese rastrexar máis atrás, como é o caso da traballada homenaxe que realizaron Carlos Portela e Fernando Iglesias coa inconclusa serie Memak. Na obra, publicada na fenecida Frente Comixario, Iglesias imitaba con precisión o debuxo do francés, mentres Portela apostaba por explotar un ambiente mestura de ciencia ficción e surrealismo en todo semellante aos mundos do falecido creador.

De xeito máis recente, Kiko da Silva apostaba por lle chamar O garaxe hermético, título dunha das obras fundamentais de Giraud ao seu proxecto de escola de banda deseñada, de próxima apertura.