O alcalde de Baiona asinaba o pasado venres un documentos cos seus homólogos de Santa Fe de Vega (Granada) e Palos da Fronteira (Huelva) polo que os tres concellos propoñen conformar unha candidatura conxunta a Patrimonio da Humanidade. Co nome Lugares colombinos de España, os promotores remitirán o proxecto a gobernos autonómicos e central con vistas a recibir os apoios necesarios para chegar ante a UNESCO. O proxecto, pendente de elaboración, busca o recoñecemento dos lugares vencellados á primeira viaxe de Cristóbal Colón a América.
Pola súa banda, a candidatura do Ferrol da Ilustración está pendente da xuntanza que anunciou para vindeiras datas a Consellaría de Cultura con representantes locais para lle dar un novo impulso ao proxecto. Malia a que boa parte da documentación da candidatura está lista, fica por crear un ente específico para a xestión da proposta, un requerimento da propia UNESCO para a tomar en consideración.
