Preséntase o calendario das Feiras do Libro 2012, con catro citas menos

En 2012 haberá catro feiras do libro menos do que o pasado ano. Monforte, Lalín, Cangas e Foz caen do calendario, segundo o concurso que publica hoxe o Diario Oficial de Galicia para coordinar estes eventos. Desde a Federación de Libreiros apuntan que este é o maior descenso no calendario feiral, logo de que nos últimos anos se conseguise manter e mesmo incrementar o número de eventos deste tipo na nosa xeografía.

Os problemas económicos, tanto das administracións como das propias librarías están, segundo os representantes do sector, detrás deste recorte, xa que en moitos casos os negocios non contan con persoal abondo para estar presentes nestas citas. No entanto, os libreiros agardan que se manteña a participación de establecementos nas distintas feiras. Desde o gremio sinalan tamén a posibilidade de que se poida organizar finalmente a cita de Foz.

O calendario ferial deste ano comezará en Ferrol o vindeiro 19 de abril e rematará en Viveiro o 16 de agosto.

Calendario de Feiras do Libro 2012

- FERROL do 19 de abril ao 24 de abril. Cantón de Molins
- SANTIAGO DE COMPOSTELA do 28 de abril ao 6 de maio. Paseo da Alameda
- LUGO do 15 de maio ao 20 de maio. Praza menor
- OURENSE do 1 de xuño ao 6 de xuño. Alameda
- VIGO do 29 xuño ao 8 de xullo. Praza de Compostela
- A CORUÑA do 1 de agosto ao 10 de agosto. Xardíns de Mendez Núñez
- VIVEIRO do 13 de agosto ao 16 de agosto. Xardíns de Noriega Varela