O coñecido pintor Leopoldo Nóvoa falecía o pasado xoves 23 en París aos 91 anos de idade. O artista, considerado un dos máis importantes nomes vivos da arte galega da emigración, canda a nomes coma Seoane ou Colmeiro, levaba varios días ingresado nun hospital da capital francesa. O seu corpo será incinerado este xoves, 1 de marzo, e a familia anunciou que en maio esparexerán as súas cinzas en Raxó, concello de Poio, nas proximidades da casa onde adoitaba pasar as vacacións.
A Sociedade Cultural e Deportiva de Raxó e mais o Concello de Poio xa anunciaron a súa intención de celebrar para entón unha homenaxe ao desaparecido artista. O presidente da Xunta, Alberte Núñez Feijóo, amosou o seu pesar "e o de todos os galegos" polo falecemento e apuntou o recoñecemento internacional que conseguiu Nóvoa. Rafael Louzán, presidente da Deputación de Pontevedra, Luciano Sobral, alcalde de Poio ou Miguel Anxo Fernández Lores, rexedor de Pontevedra, amosaron o seu pesar.
