O Xatcobeo xa está en órbita

A Axencia Espacial Europea vén de anunciar na súa conta oficial de Twitter o éxito das operacións de posta en órbita do primeiro satélite galego, o Xatcobeo, desenvolvido por profesores e estudantes da Universidade do Vigo. De feito, o principal obxectivo do novo satélite é educativo. "Profesores, investigadores con experiencia e estudantes terán unha oportunidade única para mellorar as súas capacidades en electrónica, enxeñaría de comunicación ou desenvolvemento de software". O Xatcobeo puido ser lanzado dentro dun proxecto da Axencia Espacial Europea e os radioafeccionados poderán escoitar o seu sinal no 437.365 Mhz.