O Museo de Arte Contemporánea de Vigo inicia hoxe unha xeira de tres días de intensa actividade. Presenza activa. Acción, obxecto e público abre ás doce desta mañá presentando un programa que busca a conexión entre performances e intervencións. O proxecto conta coa participación de Maja Bajević, John Bock, Gary Hill, Thom Kubli, Mads Lynnerup, Alastair MacLennan, Sergio Prego, La Ribot, Carlos Rodríguez-Méndez e SUE-C+AGF.
O proxecto, feito en colaboración co LABoral de Xixón, pode seguirse a través do web do museo, onde xa se poden ver vídeos do making of dalgún dos proxectos.
Iniciativas como a performance Record Attempt consistente en tentar bater a marca mundial de tocar a guitarra emitiranse directamente ao vivo, mentres outras das actividades iranse publicando na rede logo se gravar. A iniciativa está comisariada por Sergio Edelsztein & Kathleen Forde, e a organización solicita a participación do público, fundamental para o desenvolvemento das actividades.
