Coa intención de se converter na referencia sobre ensino no noroeste peninsular, o Concello de Pontevedra, en colaboración coa Asociación de Empresarios presentaba Edugal, o Salón da Educación. O encontro celebrarase entre os vindeiros 12 e 14 de abril no Pazo da Cultura da Cidade do Lérez, e está dirixido tanto a estudantes de secundaria como a profesores e profesionais do sector. No evento haberá postos informativos, actividades formativas e un programa que incluirá propostas deportivas e culturais.
Desde ofertas universitarias de Galicia e Norte de Portugal ata alternativas á formación convencional e propostas de e-learning, no encontro daranse cita todo tipo de cuestións relacionadas co campo educativo.
