Os editores centraranse no mercado interior en 2012

A Asociación Galega de Editores "vai centrar boa parte dos seus esforzos en dinamizar o decaido mercado interno" durante 2012. Así o anunciou nun comunicado a través do seu web, a adiantar o Plan de Acción para este ano. A AGE sinala que se está a dar unha "caída do consumo interno sen precedentes", o que levou aos seus socios a se centrar na promoción do seu traballo no propio país, sen descoidar as estratexias de internacionalización dos últimos anos, coa presenza en feiras como Boloña, Madrid, Frankfurt e Guadalaxara.

Para o vindeiro 10 de marzo celebrarase a Noite da Edición, na cal se desenvolverán homenaxes a Isaac Díaz Pardo, Presidente de Honra da AGE e mais a Carlos Casares cando se fan dez anos do seu pasamento.