O pasado venres, a Deputación de Ourense aprobou en pleno a súa saída do Consorcio Audiovisual de Galicia. Unha situación que se producirá, tal e como figuran nos estatutos da entidade, no ano 2013. Con todo, o director-xerente do Consorcio, Anxo Quintanilla, afirma que coñecía a intención da Deputación é que “buscaremos outra formas de colaboración ao longo de 2012 e de que siga implicada na actividade do Consorcio”. Quintanilla sitúa esta decisión no contexto de crise económica e de “necesidade de conseguir unha maior eficacia na xestión” e asegurou que esta decisión non implica a outras das entidades que integran o Consorcio.
Con todo, as decisión que deberá tomar o Consorcio Audiovisual de Galicia para 2012 dependen da xuntanza do Consello de Administración que terá lugar presumiblemente a principios de xaneiro. “Será nesa xuntanza na que se aprobe o plan de actividades previstos para este ano” asegurou Quintanilla. O único anunciado a día de hoxe é a renovación do sitio web da entidade, a posta en marcha dos cursos de formación da entidade (remitiron tanto formularios aos profesionais, como as celebracións das probas de preselección dos monográficos de inglés audiovisual) e o anuncio do fondo de coprodución Raíces.
