A Cidade da Cultura acolle hoxe a entrega dos Premios da Cultura Galega 2011

A biblioteca da Cidade da Cultura é o escenario escollido para que esta noite (20:00 horas) se entregen os premios da Cultura Galega. Un galardón convocado pola Consellaría de Cultura e Turismo e que recoñece a persoas e institucións en 7 categorías. Os premiados neste 2011, que recibirán unha estatuíña de bronce de Francisco Leiro, son Arcadio López Casanova na categoría de Letras, Manolo Paz en Artes Plásticas, Quico Cadaval en Artes Escénicas, a Fundación ‘Aquae Querquennae’ na de Patrimonio Cultural, Carlos Núñez en Promoción Cultural de Galicia, Rogelio Groba en Música e María Pujalte en Creación Audiovisual. O embaixador da música galega, Xoel López, actuará na gala de entrega.

Os galardoados recibirán a figura de bronce Freixa que, segundo a nota de prensa da Consellaría, "representa unha figura mitolóxica con cabeza felina que protexe nos seus brazos as mazás de ouro, que simbolizan a cultura galega. A obra de Leiro inspírase nas mitoloxías nórdica e grega, sempre interpretadas dun xeito libre e adaptadas ao imaxinario do artista".