Os científicos aseguran nun informe que non tiveron en conta os seus estudos na xestión do Prestige

Hoxe cúmprense nove anos do afundimento do petroleiro Prestige diante das costas galegas. Unha data que o Consello da Cultura Galega aproveitou para dar a coñecer a publicación titulada Recursos en I+D+i dedicaos ao estudo dos efectos da vertedura do Prestige (2003-08). Avaliación e xuízo crítico, que compila todos os estudos e publicacións arredor do tema. O documento inclúe resultados duns 200 estudos que ofrece conclusións como que a marea negra ocasionou danos por importe de 1.500 millóns; que as análises científicas non se tiveron en conta na xestión da catástrofe e que non mudou nada no sistema de aseguramento dos petroleiros. Os resultados déronse a coñecer onte no marco dunha xornada organizada pola Universidade e o Consello da Cultura Galega.