O Consello da Cultura compila as investigacións sobre o Prestige

Preto de 200 millóns de euros e outros tantos proxectos, na súa maioría liderados desde universidades galega, avaliaron a marea negra do Prestige desde diferentes perspectivas. Agora, o Consello da Cultura Galega compila estes traballos no volume Recursos en I+D+i dedicados ao estudo dos efectos da vertedura do Prestige (2003-2008). Avalación e xuízo crítico. Compilado por Victoriano Urgorri e Marcos P. Señarís, a obra inclúe un CD con edicións electrónicas dos artigos e mais está dispoñible na rede en formato pdf.

Segundo sinalou na presentación Francisco Díaz-Fierros, coordinador da Sección de Ciencia Natureza e Sociedade do Consello da Cultura, o proxecto continúa a serie de inciativas que esta institución desenvolveu sobre a catástrofe do Prestige, que inclúen un congreso, un seguimento sobre a presenza do tema nos medios de comunicación e a edición dunha banda deseñada de carácter didáctico. Aínda que a publicación actual está destinada á comunidade científica, Díaz-Fierros sinalou que ao longo deste ano o Consello realizará a partir do documento unha versión adaptada para o público xeral e para centros de ensino a amosar a produción científica vencellada a esta crise.

Victoriano Urgorri, un dos compiladores do volume, sinalou que este traballo "quere ser de utilidade para a vidneira marea negra, que pode ser calquera día".