Elvira Riveiro gaña o Certame de Poesía Erótica Illas Sisargas

A escritora e crítica Elvira Riveiro Tobío fíxose co Certame de Poesía Erótica Illas Sisargas na súa sexta edición, impóndose entre as 16 obras presentadas. carnia haikai é o título da obra que lle reportará 1.000 euros e que será publicada pola Asociación Cultural Caldeirón. O xurado deu a coñecer o seu fallo o pasado sábado 12 e destacou "a estrutura orixinal e ben tramada dun libro con moita entidade propia, a concreción na temática de referencia, o sorprendente uso da linguaxe e o tratamento orixinal e suxerente da sensualidade". No acto no que se fixo público o fallo tamén se presentou a obra Amantes de María Lado, gañadora da anterior edición do certame.