As librarías móvense cara a era dixital

Xurxo Patiño, Presidente da Federación de Libreiros de Galicia e Michelle Chevallier, a coordinadora de proxectos de CEGAL ( Confederación Española de Gremios y Asociaciones de Libreros) , presentaron hoxe en Santiago o proxecto CEGAL en rede. Esta ferramenta dixital posibilita a fluidez da información entre distribuidores, editores e librarías a través dos seus propios programas de xestión proporcionando información clara e inmediata da situación e vendas dos libros. Usuarios, editores e medios de comunicacións disporán dunha lista dos libros máis vendidos en Galicia por tramos semanais e mensuais, feita a partir dos datos directos das propias caixas rexistradoras dos establecementos.

Estas listas, xa dispoñibles para toda España e Cataluña, o estarán proximamente para Galicia en canto exista a posibilidade de ter a suficiente “masa crítica” de librarías para que resulte representativa. A ferramenta Cegal en rede ten tamén unha representación de uso comercial para o público no sitio web todostuslibros.com que posibilita, a través dunha ficha bibliográfica enriquecida coñecer en tempo real as librarías onde teñen exemplares dispoñibles dos libros. O Clúster do Libro organiza hoxe e mañá, coa colaboración do Consello da Cultura Galega, unhas xornadas técnicas orientadas a tódolos profesionais que participan no sector do libro enfocadas no aproveitamento das tecnoloxías dixitais da información e a comunicación.